Devid Kemeron: Qashshoqlikka qarshi faqat rivojlangan mamlakatlar emas, barcha davlatlar kurashishi kerak

Buyuk Britaniya bosh vaziri Devid Kemeron qashshoqlikka qarshi kurash masalasi uchun faqat rivojlangan mamlakatlar emas, balki jahonning barcha mamlakatlari yetakchilari mas’ul bo‘lmog‘i kerak, deb hisoblamoqda. Ayni vaqtda, “TASS”ning Kemeronning bayonotiga asoslanib yozishicha, rivojlangan mamlakatlar gumanitar dasturlarga mablag‘ ajratish masalasida Buyuk Britaniyadan namuna olishi lozim. Devid Kemeron. Foto: Euronews (arxiv) Kemeronning alohida qayd etishicha, Buyuk Britaniya BMT tomonidan 1970-yilda belgilangan vazifa — yalpi milliy daromadning 0,7 foizini xalqaro yordamga ajratishni uddalay olgan kamsonli rivojlangan mamlakatlardan biridir. 2014-yili Buyuk Britaniya ilk bor BMT tomonidan belgilangan marrani kesib o‘tib, xalqaro yordamga YaMDning 0,74 foizini, ya’ni, 11,4 milliard funt (17,3 milliard dollar) ajratdi. BMTga a’zo mamlakatlar 25-sentabr kuni keyingi 15 yillik global rivojlanishning kun tartibini belgilab, qashshoqlik va ocharchilikni butunlay tugatish, ijtimoiy tengsizlik va iqlim o‘zgarishiga qarshi kurashish, shuningdek, umumiy ta’limdan foydalanish imkoniyatlarini barcha uchun ochishga va’da berdi. “Mazkur maqsadlarga erishish quruq so‘zlarni emas, harakatlarni talab qiladi. Buyuk Britaniya 0,7 foizlik marraga yetish bo‘yicha o‘z majburiyatini bajargani bilan faxrlanaman va boshqa mamlakatlarni ham bizdan o‘rnak olishga chaqiraman”, — deydi Kemeron. Britaniya bosh vazirining ishonch bildirishicha, bunday yordam bugungi kunda ayniqsa muhim. “Millionlab suriyaliklar o‘z uylarini tashlab chiqishga majbur bo‘lgan bugungi og‘ir damlarda har qanday yordam umid beradi”, — deydi Kemeron. “Rivojlangan mamlakatlarning yetakchilari — hamkasblarimga shunday deyman: yillar davomida biz yordam berishni va’da qildik. Keling, endi va’dalarimizni bajaraylik. Butun jahon bizga ko‘z tikkan”, — deyiladi Kemeronning nutqida. BMT hisob-kitoblariga ko‘ra, 2000-yilda belgilangan Ming yillik rivojlanish maqsadlari o‘rnini egallaydigan yangi Barqaror rivojlanish maqsadlarini bajarish uchun yiliga 3,3 trillion dollardan 4,5 trillion dollargacha mablag‘ kerak bo‘ladi.
- deya xabar beradi Daryo internet nashri.

27 sen 2015

Комментарии (0)